Los soïsses refusèron dimenge passat per referendum una proposicion de la drecha populista que cercava d’expulsar automaticament los estrangièrs, mai que mai los refugiats, que cometan quina infraccion que siá. Aquela proposicion polemica significava qu'un refugiat podiá èsser expulsat del país per de delictes considerats menors.
 
Après una fòrta mobilizacion contra aquela proposicion, lo 59% dels elegeires votèron de non.
 
En 2010, los soïsses acceptèron, gaireben amb lo 53% dels vòtes, una iniciativa del primièr partit soís, l'Union Democratica del Centre (UDC, drecha populista), en favor d’expulsar los delinquents estrangièrs. Mas lo Parlament introduiguèt arunan una clausa que permet als jutges d’evitar dins qualques cases que los condemnats sián percaçats automaticament.
 
Aqueste còp, los elegeires se son prononciats sus l'aplicacion del sistèma automatic e sus l’esperlongament de la lista de rasons que justifican la percaça. La proposicion prevesiá principalament d’expulsar los estrangièrs que serián ja estats condemnats dins los darrièrs dètz ans e que la justícia auriá considerats colpables d’aver comesas d’infraccions menoras coma de “lesions corporalas simplas”, aver participat a una batèsta o d’“infraccions de transit”.
 
Lo Govèrn e lo quite Parlament manifestèron lor oposicion a la proposicion d’UDC, que considerèron contrària a las nòrmas fondamentalas de la democracia. Cap d’autre partit, nimai los sindicats ni los cercles economics, a pas sostengut aquela iniciativa.
 
Los soïsses celèbran de referendums cada tres meses. L’adopcion d’una proposicion requerís una dobla majoritat: la dels elegeires e la dels cantons.
 
Dimenge foguèron tanben cridats a se prononciar sus d’autras iniciativas popularas coma la construccion d’un tunèl jols Aups de Son Gottard e l'egalitat fiscala entre los parelhs que son maridats e los qu’o son pas. Dins los dos cases ganhèt l’“òc”.
 
 
 
#happysheeps tuits